ബ്ലോഗുവാരഫലം (Malayalam blog reviews)

ബ്ലോഗുവാരഫലം

2006-05-10T14:45:00.000-07:00

ബ്ലോഗുവാരഫലത്തിലേക്കു്‌ എല്ലാവര്‍ക്കും സ്വാഗതം!

മലയാളത്തിലുള്ള ബ്ലോഗുകളെ നിരൂപണം ചെയ്യുന്ന ഒരു പംക്തിയാണിതു്‌. വ്യക്തിവിമര്‍ശനമില്ലാതെ, മലയാളത്തിന്റെ നന്മയ്ക്കു വേണ്ടിയുള്ള ഒരു സംവാദമാണു്‌ ഇതിന്റെ ലക്ഷ്യം.

ഈ ബ്ലോഗുവാരഫലത്തില്‍ നിങ്ങളുടെ ബ്ലോഗും പരിഗണിക്കണമെങ്കില്‍ ആ കാര്യം (ബ്ലോഗിന്റെ പേരും URL-ഉം) ഒരു കമന്റിലൂടെ ദയവായി അറിയിക്കുക. ഭാവിയില്‍ നിങ്ങളുടെ ബ്ലോഗിനെ നിരൂപണത്തില്‍നിന്നു്‌ ഒഴിവാക്കണമെങ്കിലും ഇതിന്റെ കമന്റു തന്നെ ഉപയോഗിക്കാം.

ബ്ലോഗുവാരഫലം - 2 (മെയ് 15-21, 2005)

2005-05-24T17:05:00.000-07:00

ഉപക്രമം

ഈയാഴ്ചത്തെ വാരഫലത്തില്‍ മലയാളം ബ്ലോഗുകളില്‍ കാണുന്ന അക്ഷരത്തെറ്റുകളെപ്പറ്റി എഴുതണമെന്നു കരുതിയിരുന്നു. അതിനുവേണ്ടി ബ്ലോഗുകളൊക്കെ ഒരു വട്ടം കൂടി മുഴുവനും വായിച്ചു് തെറ്റുകള്‍ സംഭരിക്കുകയും ചെയ്തിരുന്നു. പക്ഷേ ഇവയൊക്കെ ഒന്നിച്ചുകൂട്ടി ഒരു HTML table ആയി അവതരിപ്പിക്കാന്‍ ഒരുപാടു സമയമെടുത്തു. വരമൊഴിയുടെ യൂണിക്കോഡ് പരിഭാഷകന്റെ ചില അപാകതകളും, ബ്ലോഗറില്‍ പേസ്റ്റു ചെയ്യുമ്പോള്‍ ഉള്ള ചില ബുദ്ധിമുട്ടുകളുമാണു് പ്രധാനപ്രശ്നങ്ങള്‍.

അതിനാല്‍ ഈയാഴ്ചത്തെ വാരഫലത്തില്‍ അക്ഷരത്തെറ്റുകളെപ്പറ്റിയുള്ള ലേഖനം മാത്രമേ ഉള്ളൂ. സാഹിത്യകൃതികളെപ്പറ്റിയുള്ള നിരൂപണം അടുത്താഴ്ച.

അക്ഷരത്തെറ്റുകള്‍

ഈ ലേഖനത്തില്‍ താഴെപ്പറയുന്ന തെറ്റുകള്‍ ചൂണ്ടിക്കാണിച്ചിട്ടുണ്ടു്‌.

അക്ഷരത്തെറ്റുകള്‍ : തെറ്റായ പ്രയോഗങ്ങളും വാക്കുകളും. മുഖ്യലേഖനങ്ങളിലും കമന്റുകളിലും ഉള്ള ഇത്തരം തെറ്റുകള്‍ ചൂണ്ടിക്കാണിച്ചിട്ടുണ്ടൂ്‌.
അച്ചടിത്തെറ്റുകള്‍ : ടൈപ്പു ചെയ്യുമ്പോള്‍ വരുത്തുന്ന തെറ്റുകള്‍. മുഖ്യലേഖനങ്ങളില്‍ മാത്രം തെരഞ്ഞിരിക്കുന്നു.
ഉപകരണത്തെറ്റുകള്‍ : വരമൊഴി, കീമാന്‍ തുടങ്ങിയവ ഉപയോഗിക്കുന്നതുകൊണ്ടും ഏതെങ്കിലും യൂണിക്കോഡ്‌ ഫോണ്ടോ ബ്രൌസറോ ഉപയോഗിക്കുന്നതു കൊണ്ടുമുണ്ടാകുന്ന തെറ്റുകള്‍. ഇത്തരത്തിലുള്ള വളരെക്കുറച്ചു തെറ്റുകളേ ചൂണ്ടിക്കാട്ടിയിട്ടുള്ളൂ. അതും മുഖ്യലേഖനങ്ങളില്‍ മാത്രം.
സംവൃതോകാരം തെറ്റായി ഉപയോഗിക്കല്‍ : ഇവ ചൂണ്ടിക്കാണിച്ചിട്ടേ ഇല്ല. കാരണം, ഏതു ശരി, ഏതു തെറ്റു്‌ എന്നും ഇന്നും തര്‍ക്കം നടന്നുകൊണ്ടിരിക്കുകയാണു്‌. എങ്കിലും സംവൃതോകാരത്തെ വിവൃതോകാരമായി എഴുതുന്ന രീതി ധാരാളം കാണുന്നുണ്ടു്‌. (ഈ രീതി പഴയ മലയാളത്തിലുണ്ടായിരുന്നു. പഴയ മലയാളം ബൈബിളുകളില്‍ ഇപ്പോഴും ഇതു കാണാം : "നിനക്കു എന്തു?" എന്നിങ്ങനെ.) അതു വളരെ ഭംഗി കുറഞ്ഞതായി തോന്നുന്നു. ഇതിനെപ്പറ്റി വിശദമായി "ശരിയും തെറ്റും" ബ്ലോഗില്‍ എഴുതാം.

എല്ലാ തെറ്റുകളും ചൂണ്ടിക്കാണിക്കാന്‍ പറ്റിയില്ല. കുറേ ബ്ലോഗുകള്‍ പരിശോധിച്ചു്‌ കുറേയെണ്ണം തയ്യാറാക്കി. അത്രമാത്രം. തെറ്റുകള്‍ കണ്ട ബ്ലോഗുകള്‍ കണ്ണികളായി ചേര്‍ത്തിട്ടുണ്ടു്‌. (കമന്റുകളിലുള്ള തെറ്റുകള്‍ (c) എന്നു ചേര്‍ത്തു സൂചിപ്പിച്ചിരിക്കുന്നു.) ‍ ഇതു പ്രസിദ്ധീകരിക്കുമ്പോഴേക്കും ഇതില്‍ പലതും തിരുത്തപ്പെട്ടിട്ടുണ്ടാവും.

മലയാളം ബ്ലോഗുകളെ അല്‍പമെങ്കിലും നന്നാക്കാന്‍ ഇതുപകരിക്കുമെങ്കില്‍ എന്റെ ശ്രമം ന്യായീകരിക്കത്തക്കതാണു്‌ എന്നു പ്രതീക്ഷിക്കുന്നു. ഇതില്‍ കാണുന്ന തെറ്റുകള്‍ ദയവായി ചൂണ്ടിക്കാണിക്കുക. അതുപോലെ അഭിപ്രായങ്ങളും അറിയിക്കുക. പ്രത്യേകിച്ചു്‌, ഈ അഭ്യാസം ഇനിയും വേണോ എന്നു്‌. എല്ലാം ഈ ലേഖനത്തിന്റെ കമന്റുകളായി ചേര്‍ക്കുക.

ഇനി തെറ്റുകള്‍. അക്ഷരമാലാക്രമത്തില്‍:

നം.	തെറ്റു്	ശരി	എവിടെ?
1	അക്ഷയത്രിതീയ	അക്ഷയതൃതീയ	1
2	അണ്ഠകടാഹം	അണ്ഡകടാഹം	1
3	അധിക്രമിച്ചു	അതിക്രമിച്ചു	1
4	അന്വേഷിചാല്‍	അന്വേഷിച്ചാല്‍	1
5	അമേരിക്കകാര്‍	അമേരിക്കക്കാര്‍	1
6	അശ്വത്വാമാവ്‌	അശ്വത്ഥാമാവ്‌	1
7	ആക്ഖൊഷിക്കാന്‍	ആഘോഷിക്കാന്‍	1(c)
8	ആനയെം	ആനയേം	1
9	ആപാദചൂടം	ആപാദചൂഡം	1
10	ആയില്ലെ	ആയില്ലേ	1
11	ആവശ്യമില്ലലെ	ആവശ്യമില്ലല്ലോ	1
12	ആഹ്ലദിച്ചടുത്തെത്തി	ആഹ്ലാദിച്ചടുത്തെത്തി	1
13	ഉത്ഭോധിപ്പിച്ചു	ഉദ്ബോധിപ്പിച്ചു	1
14	ഉപയൊഗിച്ചു	ഉപയോഗിച്ചു	1
15	ഉപയോഗ്ഗമില്ലാത്ത	ഉപയോഗമില്ലാത്ത	1
16	ഉപയോഗ്ഗിച്ചു	ഉപയോഗിച്ചു	1
17	ഉപ്യോഗിച്ചു	ഉപയോഗിച്ചു	1
18	എലാവര്‍ക്കും	എല്ലാവര്‍ക്കും	1
19	എഴുത്തുകരണ്‌	എഴുത്തുകാരാണ്‌	1
20	ഒടിച്ചൂ കളഞ്ഞല്ലോ	ഒടിച്ചു കളഞ്ഞല്ലോ	1
21	ഓരോ പേജുകള്‍	ഓരോ പേജ്‌, എല്ലാ പേജുകള്‍	1
22	ഔട്ട്സോഴ്സിങ്ങിറ്റെ	ഔട്ട്സോഴ്സിങ്ങിന്റെ	1
23	കടലസുകള്‍	കടലാസുകള്‍	1
24	കഥപാത്രങ്ങളുടെ	കഥാപാത്രങ്ങളുടെ	1
25	കാറ്റയരികത്ത്‌	കാറ്റായരികത്ത്‌	1
26	കാര്‍ശനമായി	കര്‍ശനമായി	1
27	കുദ്രാണ്ടം	കുന്ത്രാണ്ടം	1
28	കേരളമല്ലെ	കേരളമല്ലേ	1
29	കോളാംബി	കോളാമ്പി	1
30	ക്രിഷി	കൃഷി	1
31	ക്രൊഡീകരണ	ക്രോഡീകരണ	1
32	ഗൃന്ഥങ്ങള്‍	ഗ്രന്ഥങ്ങള്‍	1(c)
33	ഗൃഹാത്വരതയുടെ	ഗൃഹാതുരതയുടെ	1
34	ചമയ്ക്കന്‍	ചമയ്ക്കാന്‍	1
35	ചിലക്ഷരങ്ങള്‍	ചില്ലക്ഷരങ്ങള്‍	1
36	ചുള്ളീക്കട്‌	ചുള്ളിക്കാട്‌	1
37	ചെംബു	ചെമ്പു	1
38	ചെയ്യ്നുന്ന	ചെയ്യുന്ന	1
39	ജീവിതത്ത്ന്റെ	ജീവിതത്തിന്റെ	1
40	ഝാഢനം	താഡനം	1
41	ടൂറിസംകാരല്ലെ	ടൂറിസംകാരല്ലേ	1
42	താല്‌പര്യം	താത്പര്യം, താല്‍പര്യം	1
43	തെറ്റിധരിക്കരുതു	തെറ്റിദ്ധരിക്കരുതു്‌	1
44	തോന്നത്തതിനാല്‍	തോന്നാത്തതിനാല്‍	1
45	ദീര്‍ഘസുമംഗലീ ഭവഃ	ദീര്‍ഘസുമംഗലീ ഭവ	1(c)
46	ദു:ഖം	ദുഃഖം	1
47	ധീര്‍ഘവീക്ഷണം	ദീര്‍ഘവീക്ഷണം	1
48	നമളെ	നമ്മളെ	1
49	നാടൂമാകാം	നാടുമാകാം	1
50	നിക്ഷുപ്തം	നിക്ഷിപ്തം	1
51	നിറൂപകനെ	നിരൂപകനെ	1
52	നുന്നും	നിന്നും	1
53	നെറ്റിതടത്തില്‍	നെറ്റിത്തടത്തില്‍	1
54	പത്രാതിപര്‍	പത്രാധിപര്‍	1
55	പരിസ്തതി	പരിസ്ഥിതി	1
56	പഴഞ്ജന്‍	പഴഞ്ചന്‍	1
57	പാട്ടയിരുന്നു	പാട്ടായിരുന്നു	1
58	പാവന്‍	പാവം	1
59	പിടിക്കതെ	പിടിക്കാതെ	1
60	പിങ്കള	പിംഗള, പിങ്ഗള	1
61	പിന്നെയൊ	പിന്നെയോ	1
62	പിന്‍ബലമില്ലതേത്തന്നെ	പിന്‍ബലമില്ലാതെ തന്നെ	1
63	പുകവലിച്ചല്‍	പുകവലിച്ചാല്‍	1
64	പേടിതൊന്നിക്കുന്ന	പേടി തോന്നിക്കുന്ന	1
65	പൊട്ടനേ പഠിപ്പിക്കാന്‍	പൊട്ടനെ പഠിപ്പിക്കാന്‍	1
66	പോോകുകയായിരുന്നു	പോകുകയായിരുന്നു	1
67	പോട്ടെ	പോട്ടേ	1
68	പ്രസിദ്ധീകരികാന്‍	പ്രസിദ്ധീകരിക്കാന്‍	1
69	ബ്ലോഗിണി	ബ്ലോഗിനി	1, 2
71	ഭിഷ്വഗരന്‍	ഭിഷഗ്വരന്‍	1
72	മടയില്‍	മടിയില്‍	1
73	മണികുട്ടന്‍	മണിക്കുട്ടന്‍	1
74	മനഃക്കൈ	മനക്കൈ	1
75	...മാറകണം	...മാറാകണം	1
76	മുന്‌കയ്‌	മുന്‍കൈ	1
77	മ്രിദുവയര്‍	മൃദുവയര്‍	1
78	യധാര്‍ത്ഥ	യഥാര്‍ത്ഥ	1(c)
79	യാദൃശ്ചികസംഭവം	യാദൃച്ഛികസംഭവം	1(c)
80	രാജനുണുരുണ്ടതുപോലെ	രാജനുരുണ്ടതുപോലെ	1
81	രൂഡമൂലം	രൂഢമൂലം	1
82	ലാഭമത്രെ	ലാഭമത്രേ	1
83	ലൊകം പെകുന്നതിനെതിരെ	ലോകം പോകുന്നതിനെതിരെ	1
84	വന്ദ്യവയോദികന്‍	വന്ദ്യവയോധികന്‍	1(c)
85	വയിക്കട്ടേ	വായിക്കട്ടേ	1
86	വാര്‌ത	വാര്‍ത്ത	1
87	വിഡ്ഡിത്തം	വിഡ്ഢിത്തം	1
88	വിത്യാസം	വ്യത്യാസം	1
89	വേഗ്ഗം	വേഗം	1
90	ശബ്ദതാരവലി	ശബ്ദതാരാവലി	1
91	ശിഷ്യനമാര്‍	ശിഷ്യന്മാര്‍	1
92	ഷഢ്ജപഞ്ചമ	ഷഡ്ജപഞ്ചമ	1
93	സഘാക്കളെ	സഖാക്കളേ	1
94	സത്യഗ്രഹം	സത്യാഗ്രഹം	1
95	സത്യാവസ്ത	സത്യാവസ്ഥ	1
96	സാഥ്യമല്ല	സാദ്ധ്യമല്ല	1
97	സാധാ	സാദാ	1
98	സൌഭാഗ്യവതീ ഭവഃ	സൌഭാഗ്യവതീ ഭവ	1(c)
99	സ്തലം	സ്ഥലം	1, 2
101	സ്തിതി	സ്ഥിതി	1
102	സ്പെറ്റെംബര്‍	സെപ്‌റ്റംബര്‍	1
103	സൃഷ്ടാവ്‌	സ്രഷ്ടാവ്‌	1

ഉപസംഹാരം

സാക്ഷാല്‍ വാരഫലക്കാരനെ വിമര്‍ശിച്ചു ക്ഷുരകനെഴുതിയ ലേഖനത്തിന്റെ അഭിപ്രായങ്ങളില്‍ "നമ്മള്‍ വാക്കുകളുടെ അളവുമാപിനികള്‍ ആകശത്തിലോട്ടു ഉയര്‍ത്തിപ്പിടിച്ച്‌ വലം കണ്ണ്‌ അടച്ച്‌ നോക്കാറില്ലല്ലൊ" എന്നു കണ്ടു. ഞാന്‍ ചെയ്യുന്നതുപോലെയുള്ള ഈ തെറ്റുതിരുത്തലും ഉദ്ദേശിച്ചിട്ടുണ്ടോ രാത്രിഞ്ചരാ?

ബ്ലോഗുവാരഫലം - 1 (മെയ്‌ 8-14, 2005)

2005-05-17T23:45:00.000-07:00

ഉപക്രമം

മലയാളത്തില്‍ ധാരാളം പേര്‍ ബ്ലോഗുന്നതു കാണാന്‍ വളരെ സന്തോഷമുണ്ടു്‌. യൂണിക്കോഡ്‌ ഒരു സ്റ്റാന്‍ഡേര്‍ഡ്‌ ആയി വരുന്നതു കാണാനും സന്തോഷമുണ്ടു്‌. അഞ്ജലി മാത്രം മതിയല്ലോ വായിക്കാന്‍.

യൂണിക്കോഡ്‌ കൂടുതല്‍ ജനപ്രീതി നേടാനുള്ള ശ്രമങ്ങള്‍ നടക്കുന്നു എന്നു്‌ നവബ്ലോഗറായ നിഷാദിന്റെ ബ്ലോഗില്‍ വായിച്ചു. സന്തോഷം. നിഷാദിനെപ്പോലെ തന്നെ, മലയാളത്തിനു വേണ്ടി പ്രയത്നിക്കുന്ന പെരിങ്ങോടന്‍, കെവിന്‍, സിബു, പോള്‍, വിനോദ്‌ തുടങ്ങിയവരോടും മലയാളം ഇന്റര്‍നെറ്റില്‍ വായിക്കുന്നവരെല്ലാം കടപ്പെട്ടിരിക്കുന്നു.

പെരിങ്ങോടനും സിബുവും കൂടി മലയാളം ബ്ലോഗുകളില്‍ പുതിയ അഭിപ്രായങ്ങള്‍ വരുമ്പോള്‍ ഉടന്‍ തന്നെ അറിയാന്‍ ഒരു സംവിധാനമുണ്ടാക്കിയിരിക്കുന്നു. ഇതു സ്വന്തം നാടിന്റെ പേരെഴുതാന്‍ അറിയാവുന്ന എല്ലാവര്‍ക്കും ഉപയോഗിക്കത്തക്കതാണു്‌. എന്റെ എല്ലാ ബ്ലോഗുകളെയും ഞാന്‍ ഇതില്‍ ഉള്‍പ്പെടുത്തിയിട്ടിട്ടുണ്ടു്‌. എല്ലാ ബ്ലോഗന്മാരും ബ്ലോഗിനികളും ഇതില്‍ സഹകരിക്കുമെന്നു പ്രതീക്ഷിക്കുന്നു.

ബ്ലോഗ്‌ അഥവാ ബൂലോഗം, ബ്ലോഗ്‌ റോള്‍ അഥവാ ബൂലോകച്ചുരുള്‍, ബ്ലോഗന്‍, ബ്ലോഗിനി, ബ്ലോഗുക തുടങ്ങി ബ്ലോഗുകളെ ചുറ്റിപ്പറ്റി ഉണ്ടായിട്ടുള്ള വാക്കുകളെ മലയാളനിഘണ്ടുവിലേക്കു ചേര്‍ക്കണമെന്നാണു്‌ സുനിലിന്റെ അഭിപ്രായം. ബ്ലോഗുകളിലെ ഉപമകളും മറ്റും ശേഖരിക്കണം എന്നും മൂപ്പര്‍ക്കു്‌ അഭിപ്രായമുണ്ടു്‌. ഇതു മലയാളത്തില്‍ത്തന്നെ വായിക്കണമങ്കില്‍ വിശ്വപ്രഭയുടെ ആദ്യത്തെ അഭിപ്രായം വായിക്കുക.

ഇനി സാഹിത്യരചനകളിലേക്കു കടക്കാം.

കഥകള്‍:

അഹിച്ഛത്രത്തിലെ യോദ്ധാവു്‌, മാവിലായിക്കരയിലെ വിശേഷങ്ങള്‍ എന്ന മനോഹരകഥകള്‍ക്കു ശേഷം പെരിങ്ങോടന്‍ ഒരു മിനിക്കഥയുമായെത്തിയിരിക്കുന്നു - നരിയിറങ്ങുമ്പോള്‍. കഴിഞ്ഞ ഏതാനും കഥകളില്‍ നിന്നു വ്യത്യസ്തമായി ചെറിയ ഒരു ആശയത്തെ മഞ്ഞുതുള്ളിപോലെയുള്ള ഒരു മിനിക്കഥയാക്കുന്ന പഴയ പെരിങ്ങോടനെയാണു്‌ ഇതില്‍ കാണാന്‍ കഴിയുക. ഒരുപക്ഷേ, ഇതു്‌ അദ്ദേഹത്തിന്റെ ഒരു പഴയ കൃതിയാവാം. നരി എന്ന ബിംബത്തിലൂടെ ഒരു പെണ്‍കുട്ടിയുടെ മനോവിഹ്വലതകളെ ഈ കഥ വരച്ചുകാട്ടുന്നു.

കവിത തുളുമ്പുന്ന മിനിക്കഥകളും (അവനും അവളും, പ്രണയം-1, പ്രണയം-2) പൊട്ടിച്ചിരിപ്പിക്കുന്ന നര്‍മ്മകഥകളും (Ginger garlic kalaakooli with crushed veg rice, അമ്മാവനും അമ്മായിക്കും പറ്റിയ അമളി), കണ്‍പീലികളെ നനയിക്കുന്ന കുരുന്നുകഥകളു(ദൈവത്തിന്റെ കൈയിലിരിപ്പു്‌)മായി മലയാളബ്ലോഗുവായനക്കാരുടെ പ്രിയങ്കരിയായ കഥാകാരിയായി മാറിയ സൂവിന്റെ ഈയാഴ്ചത്തെ നര്‍മ്മകഥയാണു്‌ വര്‍ഷം 13. തന്റെ 13-ാ‍ം വിവാഹവാര്‍ഷികം ആഘോഷിക്കുന്നതിനെപ്പറ്റി തന്റെ സ്വതസ്സിദ്ധമായ നര്‍മ്മശൈലിയില്‍ കഥാകാരി വിവരിച്ചിരിക്കുന്നു.
സൂവിന്റെ നര്‍മ്മകഥകള്‍ എനിക്കു 'ബോബനും മോളിയും' കാര്‍ട്ടൂണുകള്‍ പോലെയാണു്‌. കഥയുടെ മൊത്തത്തിലുള്ള കെട്ടുറപ്പല്ല, അതിലുള്ള ചെറിയ ചെറിയ പ്രയോഗങ്ങളാണു്‌ കൂടുതല്‍ ഹൃദ്യം. ഇത്തവണത്തെ "സൂനാമി" എന്ന പ്രയോഗം ("സൂ" എന്ന പേരുള്ളവള്‍ എന്നു വേണമെങ്കിലും ഇതിനു്‌ അര്‍ത്ഥം പറയാമല്ലോ) വളരെ രസകരമായിട്ടുണ്ടു്‌. (ഇതു മുമ്പും പ്രയോഗിച്ചിട്ടുണ്ടു്‌.).
ഈ വാരഫലം തുടങ്ങുന്നതു സൂവിന്റെ വിവാഹവാര്‍ഷികത്തിനാണെന്നതു നല്ലതുതന്നെ. ആശംസകള്‍!
സൂ തന്റെ കഥകളൊക്കെ യൂണിക്കോഡിലാക്കിയതില്‍ വളരെ സന്തോഷം. അവ നന്നായി format ചെയ്തു്‌ അല്‍പം കൂടി പാരായണക്ഷമമാക്കിയിരുന്നെങ്കില്‍ എന്നൊരു അഭിപ്രായമുണ്ടു്‌.

മലയാളബ്ലോഗരിലെ ഏറ്റവും ശക്തവും (ക്ഷുരകന്‍ കഴിഞ്ഞാല്‍) തീക്ഷ്ണവുമായ സൃഷ്ടികളാണു്‌ ഏവൂരാന്റേതു്‌. കഥകളും നര്‍മ്മഭാവനകളും ലേഖനങ്ങളും സാങ്കേതികവിവരങ്ങളും എല്ലാം മൂപ്പര്‍ എഴുതുമെങ്കിലും കഥകളാണു്‌ ഏറ്റവും ഹൃദ്യം. എല്ലാ നിലവാരത്തിലുള്ള കഥകളും എഴുതുമെങ്കിലും അവയ്ക്കെല്ലാം ചില പ്രത്യേകതകളുണ്ടു്‌ - തീക്ഷ്ണമായ നര്‍മ്മവും ഞെട്ടിപ്പിക്കുന്ന അന്ത്യവും. എം. പി. നാരായണപിള്ള, പുനത്തില്‍ കുഞ്ഞബ്ദുള്ള എന്നീ രണ്ടു കഥാകാരന്മാര്‍ക്കേ ഈ പ്രത്യേകതകള്‍ ഞാന്‍ മലയാളത്തില്‍ കണ്ടിട്ടുള്ളൂ.
ഏവൂരാന്റെ സ്ഥിരം ശൈലിയിലുള്ള രണ്ടു കഥകളാണു്‌ ഒരു വൈകുന്നേരവും അപ്പുവിന്റെ ശരവിദ്യയും.
ഒരു മദ്യപന്റെ അന്ത്യരംഗങ്ങളാണു്‌ ഒരു വൈകുന്നേരത്തിലെ പ്രമേയം. അന്ത്യമാണെന്നു നാം അറിയുന്നില്ല - അയാളുടെ തല കരിങ്കല്ലില്‍ (താപവൈദ്യുതക്കാര്‍ക്കു സര്‍വ്വേക്കല്ലുണ്ടോ എന്തോ?) അടിച്ചു ചോര ചിന്തുന്നതുവരെ. ഈ ഷോക്ക്ട്രീറ്റ്‌മന്റ്‌ ഏവൂരാന്‍ നമുക്കു മുമ്പും തന്നിട്ടുണ്ടു്‌ - വര്‍ഗ്ഗീസിന്റെ വിസ തീരുന്നു എന്ന കഥയിലൂടെ. പക്ഷേ ഇതൊന്നും അമ്മമ്മ എന്ന കഥ നല്‍കിയ ഷോക്കിന്റെ മുന്നില്‍ ഒന്നുമല്ല.
പ്രമേയം പഴയതാണെങ്കിലും അപ്പുവിന്റെ ശരവിദ്യയും നമ്മെ വ്യാകുലരാക്കുന്നു. മറ്റു കഥകളില്‍ നിന്നു വ്യത്യസ്തമായി ഇതിന്റെ അന്ത്യം പ്രതീക്ഷിച്ചതായിരുന്നു - ഏവൂരാനെ അറിയുന്ന വായനക്കാര്‍ക്കെങ്കിലും.
പി. ജെ. ആന്റണിയുടെ അവസാനത്തെ ചിത്രമായ 'ചൂള'യുടെ പ്രമേയവും ഇതു തന്നെയാണു്‌.

ഇതു തന്നെയാണു്‌ വിശ്വപ്രഭയുടെ ഇരുള്‍മുനകള്‍ എന്ന കഥയുടെയും പ്രമേയം. വിശ്വം അതു തന്റെ സ്വന്തം ശൈലിയില്‍ സത്യവും മിഥ്യയുമെല്ലാം കൂട്ടിക്കലര്‍ത്തി, കഥയില്‍ നിന്നു ജീവിതവിമര്‍ശനത്തിലേക്കും തത്ത്വചിന്തയിലേക്കും കടന്നെത്തുന്ന പരിണാമത്തോടുകൂടി, അവതരിപ്പിച്ചിരിക്കുന്നു.
വിശ്വത്തിന്റെ സൃഷ്ടികളുടെ വായന ഒരു അനുഭവമാണു്‌. അദ്ദേഹത്തിന്റെ സ്വയം പ്രകാശമാണു്‌ ഞാന്‍ ആദ്യം വായിച്ചതു്‌. ഹാവൂ, എന്തൊരു അനുഭവം! തന്റെ പദഭണ്ഡാഗാരത്തില്‍ നിന്നു വാക്കുകളെ സസൂക്ഷ്മം വിന്യസിച്ചു്‌, അതിനു ചേര്‍ന്ന വര്‍ണ്ണങ്ങളും ലിപികളും ചേര്‍ത്തു്‌, ഒരു ചെറിയ കഥയില്‍പ്പോലും തന്റെ ചുമലിലെ മുഴുവന്‍ ഭൂമിയെയും ആവാഹിക്കുന്ന വിശ്വമെന്ന പല്ലി പിന്നെയും ചിലയ്ക്കുകയാണു്‌, നമുക്കു്‌ വിസ്മയവും അന്ധാളിപ്പും കലര്‍ന്ന ഒരു ആഹ്ലാദം നല്‍കിക്കൊണ്ടു്‌.
(ഇങ്ങനെയൊക്കെയാണെങ്കിലും, വിശ്വത്തിന്റെ ബൂലോകത്തിന്റെ വര്‍ണ്ണപ്പകിട്ടു്‌ അല്‍പം കൂടിപ്പോയില്ലേ എന്നൊരു സംശയം. പശ്ചാത്തലത്തിലുള്ള വര്‍ണ്ണങ്ങളും ചിത്രങ്ങളും മൂലം അഭിപ്രായങ്ങള്‍ പലതും വായിക്കുവാന്‍ പറ്റുന്നില്ല. പേജു ലോഡു ചെയ്യുവാന്‍ high speed internet connection ഉള്ള എനിക്കുപോലും പലപ്പോഴും സമയമെടുക്കുന്നു. Dialup connection-ല്‍ക്കൂടി ഇന്റര്‍നെറ്റു കാണുന്ന ശരാശരി മലയാളിയെക്കൂടി ഒന്നു കണക്കിലെടുക്കണേ!)
സത്യം പറയട്ടേ, ഒ. വി. വിജയനെപ്പോലുള്ളവരുടെ കഥകള്‍ വായിച്ചു പരിചയമുണ്ടെങ്കിലും വിശ്വത്തിന്റെ മിക്കവാറും കൃതികളും എനിക്കു വളരെ ദുര്‍ഗ്രഹമായിത്തോന്നിയിരുന്നു. നിഴലുകളുടെ ഉത്സവം ഒന്നും രണ്ടും മൂന്നും ഭാഗങ്ങള്‍ ഞാന്‍ വീണ്ടും വീണ്ടും വായിക്കുകയാണു്‌. ഇരുള്‍മുനകളില്‍ പതിവിനു വിപരീതമായി അദ്ദേഹം കഥ സാമാന്യജനത്തിനു മനസ്സിലാകുന്ന ഭാഷയില്‍ പറഞ്ഞിരിക്കുന്നു.

കവിതകള്‍:

സിബു കുഞ്ഞിപ്പാട്ടുകളില്‍ രണ്ടു പുതിയ നല്ല പാട്ടുകള്‍ ചേര്‍ത്തിട്ടുണ്ടു്‌ - പന്തളം കേരളവര്‍മ്മയുടെ ദൈവമേ കൈതൊഴാം (ഇതു സുനിലിന്റെ വായനശാലയിലും പ്രസിദ്ധീകരിച്ചിരുന്നു.), ജി. ശങ്കരക്കുറുപ്പിന്റെ കാട്ടുമരത്തിന്‍ കൊമ്പുകള്‍ എന്നിവയാണു്‌ അവ. കവിതകള്‍ ചേര്‍ക്കുമ്പോള്‍ അവയുടെ രചയിതാക്കളെക്കൂടി പരാമര്‍ശിക്കുന്നതു നന്നായിരിക്കും.

നല്ല കൃതികളെ (അധികവും കവിതകള്‍) വായനക്കാര്‍ക്കു പരിചയപ്പെടുത്തുന്ന ഒരു ബ്ലോഗാണു സുനിലിന്റെ വായനശാല. കേട്ടുമറന്ന ഒരുപിടി കവിതകളും പാട്ടുകളും ശ്ലോകങ്ങളും ഇതിനകം വായനശാലയില്‍ വായിക്കാന്‍ കഴിഞ്ഞു. ഇതുവരെ വായിച്ചിട്ടില്ലെങ്കില്‍ തീര്‍ച്ചയായി വായിക്കുക - ആദ്യം മുതല്‍.
വായനശാലയുടെ രൂപകല്‍പനയെപ്പറ്റി എനിക്കു ചില അഭിപ്രായങ്ങളുണ്ടു്‌.
- ഉദ്ധരണികളും സുനിലിന്റെ സ്വന്തം കൃതികളും വെവ്വേറേ ബ്ലോഗുകളില്‍ കൊടുക്കുക. പ്രശസ്തകൃതികളും, സ്വന്തം കൃതികളും ലേഖനങ്ങളും കൂടിക്കുഴഞ്ഞ ഒരു അവസ്ഥയാണു്‌ ഇന്നുള്ളതു്‌.
- ഏകതാനമായ font size ഉപയോഗിക്കുക. പല വലിപ്പത്തിലുള്ള fonts ഉപയോഗിക്കുന്നതുകൊണ്ടു വായിക്കാന്‍ അരോചകത്വമുണ്ടാക്കുന്നതല്ലാതെ പ്രത്യേകിച്ചു പ്രയോജനമൊന്നുമില്ല. (ലിപികളെയും വര്‍ണ്ണങ്ങളെയും കൊണ്ടു കളിച്ചു്‌ ഒരു വിസ്മയലോകം സൃഷ്ടിക്കുന്നതു വിശ്വം മാത്രമാണു്‌ മലയാളബ്ലോഗരില്‍.)
- വരികള്‍ മുറിക്കുന്നതെവിടെ എന്ന കാര്യത്തിലും അല്‍പം കൂടി ശ്രദ്ധിക്കുക.
- വരമൊഴിയില്‍ ടൈപ്പുചെയ്യുന്നതുകൊണ്ടുണ്ടാവുന്ന സാധാരണ അക്ഷരത്തെറ്റുകള്‍ കടന്നുകൂടുന്നുണ്ടു്‌. അവയെ തിരുത്തുക. ഉദ്ധരണികളാകുമ്പോള്‍ ഇതു കൂടുതല്‍ പ്രധാനമാണു്‌.
കഴിഞ്ഞാഴ്ചത്തെ വായനശാലയില്‍ പന്തളം കേരളവര്‍മ്മയുടെ രണ്ടു കുട്ടിക്കവിതകളും - പൈങ്കിളിയേ പൈങ്കിളിയേ, ദൈവമേ കൈതൊഴാം - വൈലോപ്പിള്ളിയുടെ മാമ്പഴം എന്ന ഹൃദയഹാരിയായ കവിതയും കാണാം. വളരെ നന്ദി. മാമ്പഴത്തിന്റെ അവസാനത്തില്‍ "ആരാണെഴുതിയതു്‌, എന്താണു പേരു്‌ എന്നു പ്രത്യേകിച്ചു പറയേണ്ട ആവശ്യമില്ലല്ലോ" എന്നു കണ്ടു. ഇതു വായിക്കുന്ന എല്ലാവര്‍ക്കും അതു്‌ അറിയണമെന്നില്ല. അതിനാല്‍ അവ കൊടുക്കുന്നതുതന്നെയല്ലേ ഉചിതം?

വായനശാല പോലെ നല്ല ശ്ലോകങ്ങള്‍ പ്രസിദ്ധീകരിക്കുന്ന ഒരു ബ്ലോഗാണു്‌ അക്ഷരശ്ലോകസദസ്സ്‌. അക്ഷരശ്ലോകത്തിനു വേണ്ടിയുള്ള ഒരു യാഹൂ ഗ്രൂപ്പില്‍ നടന്നു വരുന്ന ഒരു സദസ്സിന്റെ റിപ്പോര്‍ട്ടു മാത്രമാണു്‌ ഇതെങ്കിലും, വളരെ നല്ല ശ്ലോകങ്ങള്‍ ഇതില്‍ വരാറുണ്ടു്‌. കഴിഞ്ഞാഴ്ച ചൊല്ലിയ 14 ശ്ലോകങ്ങള്‍ ഇവിടെ കാണാം.

മൌലികകൃതിയായി അധികം കവിതകള്‍ കാണുന്നില്ല. ഏറ്റവും നല്ല കവിതകള്‍ പ്രസിദ്ധീകരിക്കപ്പെടുന്നതു പോളിന്റെ തര്‍ജ്ജനിയിലാണു്‌. കഴിഞ്ഞാഴ്ച അവിടെ ഒന്നും കണ്ടില്ല. തര്‍ജ്ജനിയുടെയും ജാലകത്തിന്റെയും കഴിഞ്ഞ താളുകള്‍ വായിച്ചുനോക്കൂ.

ലേഖനങ്ങള്‍:

സമകാലികസംഭവങ്ങളെപ്പറ്റി വിവിധമാദ്ധ്യമങ്ങളില്‍നിന്നുള്ള ഉദ്ധരണികളുമായി പോള്‍ ജാലകത്തില്‍ റിപ്പോര്‍ട്ടു ചെയ്യാറുണ്ടു്‌. ഈ ലേഖനങ്ങളെല്ലാം വളരെ വിജ്ഞാനപ്രദങ്ങളാണു്‌.
ഈയാഴ്ചയിലെ വാരാന്തവായനയില്‍ പ്ലാച്ചിമടയിലെ സമരത്തിനു ജീവന്‍ നല്‍കുന്ന മയിലമ്മയെപ്പറ്റിയും കാനായി കുഞ്ഞിരാമന്റെ കലാജീവിതത്തെപ്പറ്റിയും വായിക്കാം. ഗൊദര്‍ദുമായും വി. പി. ശിവകുമാറുമായുമുള്ള സംവാദങ്ങളും നന്നു്‌. കോളേജ്‌ വിദ്യാര്‍ത്ഥികള്‍ ചേര്‍ന്നു പുറത്തിയറക്കിയ ന്യൂസ്‌പേപ്പര്‍ ബോയ്‌ എന്ന സിനിമയുടെ വിവരങ്ങള്‍ പുതിയ അറിവായിരുന്നു.

ബ്ലോഗരില്‍ ഏറ്റവും ശ്രദ്ധ പിടിച്ചുപറ്റിയിട്ടുള്ള ലേഖകനായ ക്ഷുരകന്റെ മൂന്നു ലേഖനങ്ങള്‍ ഈയാഴ്ച പ്രസിദ്ധീകരിച്ചിരുന്നു. ടാഗോറിന്റെ നോബല്‍ സമ്മാനത്തിനു വന്ന ഗതികേടിനെപ്പറ്റിയും (Duplicate, duplicate), മലയാളം പത്രങ്ങള്‍ ബ്ലോഗുകളെ അവഗണിക്കുന്നതിനെപ്പറ്റിയും (മലയാളത്തിന്റെ തലവിധി), മലയാളത്തിനു വേണ്ടി മാത്രമൊരു ബ്ലോഗ്‌ റോളിന്റെ ആവശ്യത്തെപ്പറ്റിയും (മലയാളം ബൂലോഗച്ചുരുള്‍). എല്ലാം നല്ല ലേഖനങ്ങള്‍. ഇക്കുറി എന്തോ ചൂടുള്ള രാഷ്ട്രിയലേഖനങ്ങള്‍ കണ്ടില്ല.

പാശ്ചാത്യരുടെ മാതൃദിനത്തില്‍ ഏവൂരാന്‍ എഴുതിയ അമ്മയ്ക്കു്‌ എന്ന ലേഖനം ഹൃദ്യമായിരുന്നു. ശങ്കരാചാര്യരുടെ ആസ്താം താവദിയം... എന്ന ശ്ലോകം ഓര്‍ത്തുപോയി.
ഏവൂരാന്‍ മറ്റു പല ലേഖനങ്ങളും ഈയാഴ്ച എഴുതി. കരുണാകരവീരചരിതം എന്ന ആക്ഷേപഹാസ്യലേഖനം ഒരുപക്ഷേ ആ പത്രവാര്‍ത്ത വായിച്ച എല്ലാവര്‍ക്കും തോന്നിയതായിരിക്കണം. അതു നര്‍മ്മത്തില്‍ ചാലിച്ചു്‌ (പിള്ളേരെ നോക്കണം...) എഴുതിയിരിക്കുന്നു.
മദ്ധ്യപ്രദേശത്തെ ശിശുവിവാഹത്തെ എതിര്‍ത്ത സാമൂഹ്യപ്രവര്‍ത്തകയുടെ കൈ വെട്ടിയതിനെപ്പറ്റിയുള്ള ലേഖനം നടുക്കമുളവാക്കി. മലയാളം ബ്ലോഗ്‌ റോളിനെപ്പറ്റിയും ഫയര്‍ഫോക്സിനെപ്പറ്റിയും ഫയര്‍ഫോക്സിലെ ബഗ്ഗിനെപ്പറ്റിയും ഉള്ള ലേഖനങ്ങള്‍ ഉപയോഗപ്രദങ്ങളായിരുന്നു.

സുനിലിന്റെ വായനശാലയില്‍ കഥയോ കവിതയോ ലേഖനമോ എന്നു നിശ്ചയമില്ലാത്ത കുറേ കൃതികള്‍ കണ്ടു.
മനസാ ശിരസാ നമിക്കുന്നു എന്നതു്‌ കഥയില്‍ തുടങ്ങി ലേഖനത്തിലേക്കു പരിണമിച്ചു കഥയില്‍ത്തന്നെ പര്യവസാനിക്കുന്ന ഒരു കൃതിയാണു്‌. ആകെക്കൂടി കൊള്ളാം.
സിനിമ - അപക്വമായ ചിന്തകള്‍ എന്ന ലേഖനത്തില്‍ കഥകളി, ചിത്രകല തുടങ്ങിയവയെ അപേക്ഷിച്ചു നോക്കുമ്പോള്‍ സിനിമ ഒരു അപക്വമായ കലയാണു്‌ എന്നു പ്രസ്താവിച്ചിരിക്കുന്നു. ഇതിനെപ്പറ്റി ഒരു ചൂടുപിടിച്ച വിവാദം ഞാന്‍ പ്രതീക്ഷിച്ചു. ഒന്നുമുണ്ടായില്ല. എനിക്കു പൂര്‍ണ്ണമായി യോജിക്കാന്‍ പറ്റുന്നില്ല. അതിനെപ്പറ്റി വിശദമായി മറ്റൊരിടത്തെഴുതാം.
കൂട്ടുകാരിയുടെ ആത്മഹത്യയുടെ ഓര്‍മ്മയ്ക്കു്‌ ഒരു കവിതയാണെന്നു തോന്നുന്നു. എനിക്കു കാര്യമായി ഒന്നും മനസ്സിലായില്ല എന്നതാണു സത്യം.
ഇനിയുമുണ്ടു്‌ ഏതാനും ലേഖനങ്ങള്‍ കൂടി. കാര്യമായി ഒന്നും പറയാന്‍ ഇല്ല അവയെപ്പറ്റി. എല്ലാം വായനശാലയില്‍ വായിക്കാം.

ഉപസംഹാരം

ഓരോ ബ്ലോഗനെയും ബ്ലോഗിനിയെയും പ്രത്യേകമായി നിരൂപിക്കാം എന്നു കരുതി എഴുതിത്തുടങ്ങിയതാണു്‌. പിന്നീടാണു` ഓരോ സാഹിത്യശാഖയെയുമാക്കിയതു്‌. അതുകൊണ്ടാണു കൂടിക്കുഴഞ്ഞ ഒരു ശൈലി ഇതില്‍ കാണുന്നതു്‌. അടുത്ത വാരം മുതല്‍ അല്‍പം കൂടി കെട്ടുറപ്പുള്ളതാക്കാന്‍ ശ്രമിക്കാം.

പുതിയ ചില ബ്ലോഗുകളും കാണാനിടയായി. അനില്‍, അരുണ്‍, സന്തോഷ്‌, നിഷാദ്‌ എന്നിവരുടെ. അവയെപ്പറ്റിയുള്ള അഭിപ്രായം അടുത്താഴ്ച എഴുതാം.

ബൂലോഗചിത്രഗുപ്തനായ (ഈ പ്രയോഗം വായനശാലക്കാരനായ സുനിലിന്റേതു്‌) മനോജ്‌ ഒരു കഥ എഴുതിത്തുടങ്ങിയതിന്റെ ആദ്യത്തെ രണ്ടു ഭാഗങ്ങള്‍ വായിച്ചു. ഒരു technical geek എന്നു ഞാന്‍ കരുതിയിരുന്ന മനോജില്‍നിന്നു്‌ ഇത്രയും നല്ല ഒരു മലയാളകഥ കിട്ടുന്നതില്‍ വളരെ സന്തോഷം. കഥ പൂര്‍ത്തിയായിട്ടു നിരൂപണമെഴുതാം.

രാത്രിഞ്ചരനെയും കെവിനെയും ഈയാഴ്ച കണ്ടില്ല. രാത്രിഞ്ചരന്റെ കഥയും ലേഖനവും നര്‍മ്മഭാവനയും എല്ലാമായ രസികന്‍ ലേഖനങ്ങള്‍ ഇനിയും പ്രതീക്ഷിക്കുന്നു. സംസാരഭാഷയില്‍ രസകരമായി എഴുതുന്ന ഒരേയൊരു ബ്ലോഗനായ (സിജിയെയും കൂട്ടി "ബ്ലോഗനും ബ്ലോഗിയും" എന്നു പറയാം, അല്ലേ?) കെവിനെയും ഈയിടെയായി അധികം കാണാറില്ല.

ഇതിന്റെ രൂപകല്‍പനയെപ്പറ്റിയും പ്രതിപാദനരീതിയെപ്പറ്റിയും ദയവായി കമന്റടിക്കുക. വാരഫലം നന്നാക്കാനുള്ള എല്ലാ അഭിപ്രായങ്ങളെയും സ്വാഗതം ചെയ്യുന്നു.

ബ്ലോഗുവാരഫലത്തിലെ ബ്ലോഗുകള്‍

2005-05-11T13:18:00.000-07:00

അപേക്ഷ അയയ്ക്കുന്ന പരിപാടി പലര്‍ക്കും അങ്ങോട്ടു പിടിച്ചില്ല. വടികൊടുത്തു്‌ എന്തിനു്‌ അടി വാങ്ങണം എന്നു്‌ അവരും കരുതുന്നുണ്ടാവും.

അതിനാല്‍ ഞാന്‍ താഴെപ്പറയുന്ന ബ്ലോഗുകളെപ്പറ്റി അഭിപ്രായം പറയാന്‍ തീരുമാനിച്ചു. ഇവയില്‍ ഏതെങ്കിലും ഒഴിവാക്കണമെങ്കിലോ പുതിയതു ചേര്‍ക്കണമെങ്കിലോ അറിയിക്കുക - ഇതിനു കമന്റടിച്ചോ എനിക്കു്‌ (umesh65nair അറ്റ്‌ gmail.com) ഒരു എഴുത്തയച്ചോ.

പോളിന്റെ ജാലകവും അതിനോടു ചേര്‍ന്ന മറ്റു പേജുകളും.
പെരിങ്ങോടന്റെ എന്റെ ലോകവും, കഥകളും, സമകാലികവും.
സുനിലിന്റെ വായനശാല.
രാത്രിഞ്ചരന്റെ നിശാസഞ്ചാരം.
വിശ്വപ്രഭയുടെ വിശ്വം ബ്ലോഗ്‌.
സൂവിന്റെ സൂര്യഗായത്രി.
കെവിന്റെ കെവിനും സിജിയും.
ഏവൂരാന്റെ എന്റെ മലയാളം.
സിബുവിന്റെ കുഞ്ഞിപ്പാട്ടുകള്‍.
അനിലിന്റെ അക്ഷരം

അക്ഷരശ്ലോകം, Varamozhi FAQ, Linux and Malayalam എന്നിവയെയും വല്ലപ്പോഴും പരാമര്‍ശിക്കാം.

മറ്റൊന്നുകൂടി. അക്ഷരത്തെറ്റു ചൂണ്ടിക്കാട്ടുമെന്നു പറഞ്ഞതു്‌ ഓരോ ബ്ലോഗിലെയും തെറ്റുകള്‍ വിസ്തരിക്കുമെന്നല്ല. "ഈയാഴ്ചത്തെ അക്ഷരത്തെറ്റുകള്‍" എന്നൊരു ലേഖനം എല്ലാ ആഴ്ചയും ഉണ്ടാവും. പോയ ആഴ്ചയിലെ ഏറ്റവും മികച്ച (?) തെറ്റുകള്‍ ബ്ലോഗിന്റെ പേരു വെയ്ക്കാതെ അതില്‍ പരാമര്‍ശിച്ചേക്കും. അത്രമാത്രം. നല്ല മലയാളം എഴുതാനും തെറ്റുകള്‍ തിരുത്താനും അതു്‌ ഒരു പ്രചോദനമാകും എന്നു പ്രതീക്ഷിക്കുന്നു.

അടുത്ത ചൊവ്വാഴ്ച ആദ്യത്തെ വാരഫലം പ്രതീക്ഷിക്കാം.

ബ്ലോഗുവാരഫലം തുടങ്ങുന്നു

2005-05-10T14:36:00.000-07:00

മലയാളത്തിലുള്ള ബ്ലോഗുകളെ നിരൂപണം ചെയ്യുന്ന ഒരു ബ്ലോഗ്‌ തുടങ്ങുകയാണു്‌.

ഈ ബ്ലോഗിനെപ്പറ്റി:

വാരഫലം എന്നു പേരിലുണ്ടെങ്കിലും എല്ലാ ആഴ്ചയിലും ഇതുണ്ടാവണമെന്നോ ആഴ്ചയില്‍ ഒന്നേ ഉണ്ടാവൂ എന്നോ നിര്‍ബന്ധമില്ല. എനിക്കു സമയവും മനസ്സും ഉള്ളപ്പോഴൊക്കെ ഇതു പ്രതീക്ഷിക്കാം.

എല്ലാ മലയാളബ്ലോഗുകളെയും കയറി വധിക്കാന്‍ ഉദ്ദേശിക്കുന്നില്ല. വെറുതെയെന്തിനു വടി കൊടുത്തു്‌ അടി വാങ്ങണം? തന്റെ ബ്ലോഗ്‌ നിരൂപണം ചെയ്യണമെന്നുള്ള അപേക്ഷ കിട്ടിയാലേ അതിനെ പരിഗണിക്കുകയുള്ളൂ. എപ്പോഴെങ്കിലും വധം മതിയായെന്നു തോന്നിയാല്‍ അതു നിര്‍ത്തുകയുമാവാം.

അപേക്ഷകള്‍ ഈ ബ്ലോഗിന്റെ ഏറ്റവും മുകളിലുള്ള ലേഖനത്തിന്റെ കമന്റുകളായി എഴുതുക. നിങ്ങളുടെ പേരും, ബ്ലോഗിന്റെ പേരും ബ്ലോഗിന്റെ URL-ഉം കൊടുക്കുക. മനോജിന്റെ മേളം ബൂലോകച്ചുരുളിലുള്ള മലയാളം ബ്ലോഗുകള്‍ മാത്രമേ പരിഗണിക്കുകയുള്ളൂ.

നിങ്ങളുടെ എല്ലാ പോസ്റ്റുകളെയും പറ്റി അഭിപ്രായം പറയണമെന്നില്ല. എഴുതണമെന്നു തോന്നുന്നവയെപ്പറ്റി മാത്രം. ഒരു പോസ്റ്റിനെപ്പറ്റി എഴുതിയില്ലെങ്കില്‍ അതു്‌ എനിക്കു്‌ ഇഷ്ടപ്പെട്ടില്ല എന്നു ദയവായി കരുതരുതു്‌.

വധം എന്നു മുകളില്‍ പറഞ്ഞെങ്കിലും വധിക്കാന്‍ എനിക്കു്‌ ഉദ്ദേശ്യമില്ല. നമ്മളൊക്കെ എഴുത്തില്‍ തുടക്കക്കാരെന്നു മനസ്സിലാക്കി അഭിപ്രായം പറയുക മാത്രമേ ഉള്ളൂ. നല്ലതിനെ പ്രശംസിക്കുകയും ചെയ്യും.

എങ്കിലും, അക്ഷരത്തെറ്റുകളും പ്രയോഗവൈകല്യങ്ങളും നിര്‍ദ്ദാക്ഷിണ്യമായി ചൂണ്ടിക്കാണിക്കും. അതില്‍ വിഷമമുണ്ടെങ്കില്‍ ദയവായി അപേക്ഷ നല്‍കാതിരിക്കുക.

എന്റെ ഓരോ അഭിപ്രായത്തിനും ഖണ്ഡനമായും മണ്ഡനമായും അഭിപ്രായങ്ങള്‍ ഉണ്ടാകുമെന്നു പ്രതീക്ഷിക്കുന്നു. അങ്ങനെ ഇതു്‌ ഒരു നല്ല ബ്ലോഗുസാഹിത്യചര്‍ച്ചാവേദിയാകണം എന്നാണു്‌ എന്റെ ആഗ്രഹം.

ഈ ബ്ലോഗുവാരഫലത്തിലേക്കു്‌ എല്ലാവരെയും ഹാര്‍ദ്ദമായി ക്ഷണിച്ചുകൊള്ളുന്നു.